《由你去推介，我幫你表態！ #陳柏宇》

on May 06, 2022 0 個評論

📝 [Written by @caang.1 ] 🎵

第一次嘅歌手，就係曾經嘅「隱世歌神」陳柏宇，之所以係曾經，係因為而家大家都知道佢嘅歌唱實力啦！但佢喺娛樂圈，真係好特別，就如黃子華所講「不主動、不拒絕」，對獎項同名聲都唔太在意。但責任就會負啦，而家個個都知佢係一個好有責任感嘅父親。到底大家最鐘意陳柏宇嘅幾首歌係邊幾首呢？我哋而家即刻開估！

Top 5 #斷絕來往
柏宇嘅第二首派台歌，係出自佢嘅第一隻大碟《First Experience》。當年呢首歌都幾紅㗎，亦令好多人認識Jason，而呢首歌亦有個合唱版本，係由Jason同作詞人黃凱琪合唱，唔知有幾多人聽過呢？

Top 4 #對得起自己
呢首喺舊年推出嘅歌，係柏宇去年演唱會嘅主題曲。歌曲除咗旋律動聽，最緊要係啲詞寫得好正面，為情緒低沉嘅香港人打打氣，鼓勵大家做咩都唔可以咁易放棄，所以先令咁多人鐘意呢首歌。

Top 3 #你瞞我瞞
可能大家都覺得呢首歌太代表作，所以反而冇想像中咁多人提及。但無可否認，直至今日大家都仲好鐘意呢首歌，喺YouTube嘅點擊率已經超越一千五百萬。另外，大家有冇喺K房點過呢首歌？有冇都俾個Sharp-Cut伏到呢？

Top 2 I will be loving you (版權問題要用第二個MV)
呢首歌都係柏宇另外一首代表作，但相信大家更有印象嘅係佢喺MV入面對住個電話唱歌嘅片段，可惜因為版權問題冇得喺呢到俾大家睇。MV入面嘅Sony Ericsson，真係一代回憶～

Top 1 #逸後
呢首歌喺Jason嘅演唱會都有再唱，相信最多人揀呢首歌都係咁嘅原因。官方上載嘅YouTube片都有好多人睇過而且大嗌感動。除咗因為Jason真摯嘅演繹，相信片中嘅動畫，對香港人嚟講感觸好深。另外，呢首歌原版真係好高音，唔識唱歌嘅真係會唱到斷氣，再次印證陳柏宇真係好強。

最意想不到之選 #所多瑪城
Jason嘅Sidetrack作品，應該同大熱嘅一樣咁多。但估唔到都有幾位朋友都有提及呢首「所多瑪城」，呢首歌同另外一首「巴別塔」相對應，都係用聖經出現嘅名而命名，而所探討嘅訊息都好深，相信需要一啲時間去摻透。

除咗大家揀嘅歌，我都節錄咗一啲觀眾嘅留言，都表達咗一啲對柏宇嘅印象，大家估下觀眾講咗啲咩？