#悅與歌2022新歌推介- 林家謙《邊一個發明了ENCORE》

on Aug 31, 2022 0 個評論

#悅與歌2022新歌推介

初初見到歌名《邊一個發明了ENCORE》以為家謙繼續佢種玩味、幻想同輕鬆歌系列，但第一次聽同睇MV（呢首歌MV比電台同串流平台率先上架）之後，就對首歌有180度轉變，可以話係家謙出道以來最感動、賺人熱淚嘅歌。

繼《時光倒流一句話》同《難道喜歡處女座》之後，林家謙再次邀得黃偉文為佢嘅作品填詞，而Wyman再次交出一份好觸動人心嘅歌詞出來。家謙過往嘅情歌作品都會比人一種較為抽離嘅感覺，較多係用一種旁觀者嘅角度敘述，投放感情都較為含蓄。但今次《邊一個發明了ENCORE》就聽到佢有種由第一身出發，用自身角度感受呢份歌詞嘅重量，所以演繹上來都比過往直率。就算係佢最標誌性嘅轉音位，都聽到佢把聲比以往多咗一份情緒，相信都同佢個人用一個更切身嘅角度去感受呢份歌詞有關。

能夠令一直都比較「高冷」嘅家謙轉用一個更加直接嘅方法去演繹呢首歌，可能係因為呢份歌詞真係好貼近現實，所描寫嘅內容好容易引起大眾共鳴。好似Wyman之前寫比馮允謙嘅《給缺席的人唱首歌》咁，呢首歌都算係向「缺席」的人致意。近年嘅社會事件、疫情同移民潮都令好多人與人之間嘅距離越拉越遠，好多我哋曾經以為唔會發生嘅事情發生咗，好多我哋以為仲有好多機會見面嘅人突然離開咗，甚至連講句再見機會都無。當呢個情況成為常態，我哋能夠做嘅就只有珍惜每段相遇、每個親友，希望延長每次相聚嘅時間，就好似演唱會不停ENCORE咁。但再多次「安歌」，天下都無不散之筵席，我哋終有道別、分開嘅一日。唯有真正將相處嘅回憶、建立嘅情誼放入心中，先能夠真正將一段關係、一段感情永遠長存。

就算此時離了座，定有一個未來能伴著過。