廣東歌介紹 / 「呢首《辛苦你了》可以話係容祖兒嘅自白」

📝 [Written by 悅•與•歌 delightcantopop] 🎵

《辛苦你了》
曲：徐繼宗
詞：許弘毅
編：何秉舜
監：舒文@Zoo Music
主唱：容祖兒
Official MV: https://youtu.be/x6XG6R9aYKU

近來密鑼緊鼓咁做緊2021年度推介，所以新歌推介嘅帖文少咗，而且積咗唔少上年年底嘅歌曲未寫，所以趁有少少空檔就寫返一首，揀咗容祖兒最新專輯《薛丁格的貓》入面最新派台歌《辛苦你了》。

曾經有一段時間我都有少少抗拒聽同寫容祖兒嘅歌，特別近年香港經歷咁多事情之後，呢位已經「北望神州」嘅歌手亦慢慢將工作重心轉移到中國大陸。佢曾經係最啟發到我嘅歌手，佢嘅多首經典作品亦係我成長階段之中不可或缺嘅部份，亦可以話係開啟我聽廣東歌嘅一位偶像。一直以來，佢最令我佩服嘅係佢從來都好認真看待每一個演出，小至電視台音樂節目，大至紅館演唱會，佢都付出佢嘅所有，所以呢二十多年嚟佢嘅現場表演甚少出現失準嘅情況。兩年前喺紅館舉辦佢二十周年演唱會，張敬軒亦透露佢為咗準備演唱會所作嘅付出係遠超想像，而我哋確實見到佢連續十三日開演唱會都無「爛聲」無失準。作為表演者，我覺得佢真係一個非常專業、非常尊重樂迷嘅一位歌手。

呢首《辛苦你了》可以話係容祖兒嘅自白，許弘毅寫嘅歌詞或許係佢出道呢二十二年嘅感受，好似「我決志毋負身邊對我期望」、「細細個便已不想旁人失望」、「我試過憑目光感覺我存在」、「出生當天開始便拼搏為了成大器」等，一直以來嘅認真同專業塑造咗容祖兒呢位樂壇天后，但過程其實有好多大家睇唔到嘅辛酸。正如歌曲尾段佢話需要對住鏡入面嘅自己講「辛苦你了」，希望可以放任做自己，偷懶做自己。

除咗歌詞之外，都好喜歡何秉舜嘅編曲，用上唔少樂器伴奏去營造首歌嘅氣氛，雖然唔算好複雜，但有一種好配合首歌嘅大器感覺。當然，容祖兒一貫穩定而且自然嘅演繹亦為首歌加唔少分，而且由於首歌可以話係佢自白，所以歌聲之中埋藏住一種真誠，係自《悲觀生物學》之後好少再聽到嘅感覺。加上MV送上出道呢二十二年嘅種種畫面，更令人感動。

其實有時聽歌都好簡單，用返最純粹嘅直覺去感受呢首歌，或者會有一種久違嘅感動。

💿🛍️ 購買薜丁格的貓(CD)-容祖兒: