音樂樂評

📝 [Written by @on9upmusic ] 🎵 上年新人輩出，其中喺年頭呼聲好高，但turn out成績平平嘅Mike曾比特，唔知係咪覺得自己喺香港太多對手、太少廣告，好難喺同輩之中突圍而出，早幾個月竟然北上發展，參加音樂真人騷《聲生不息》。呀，又真係估佢唔到，節目出咗街短短幾集，又真係畀佢殺出重圍，喺內地人氣急升，勢頭似乎幾好！ 嗱就咁，藝人或歌手返大陸發展，其實我一直都覺得冇問題。始終香港太細，700萬個觀眾亦太少，想發圍、有野心、想大紅大紫嘅人，唔甘心淨係喺呢片彈丸之地撈，係相當合理。加上，唔通其他國家城市有人都鍾意你，想聽你唱歌，你真係會唔想去咩？BTS都紅到癲啦，咪一樣去晒全球開騷。姜濤都話要做亞洲第一啦，咁唔通你逼佢淨係喺香港咩？可能有人會覺得，好多歌手當香港係跳板，當香港觀眾係水魚，一紅就出走香港，冇晒影。但又試問，有邊個國際歌手唔係咁呢？Lady Gaga先喺美國爆紅，短短一兩年全球無人不曉，咁人哋咪向世界發展囉，咁唔通美國人又鬧Gaga當美國係跳板咩？咪玩啦。Mike其實係唱得之人，爆炸頭造型我亦十分欣賞。但喺香港仲未站穩陣腳，代表作都未有一首就向高空發展，呢座大樓似乎起得有啲急趕，驚遲早會塌。Any肥，祝福佢搵到音樂上嘅伯樂，發掘屬於自己嘅音樂路向（唔係老土Eric Kwok style）亦希望所有北上發展嘅歌手藝人，可以敢於喺節目稱自己「我來自香港。」咁就足夠。   購買MIKE (Deluxe Version)(CD)-Mike 曾比特:  

📝 [Written by @caang.1 ] 🎵 睇演唱會都睇到開盲盒抽蛋咁，對上一次應該都係容祖兒嘅Pretty Crazy演唱會。記得當時嘅嘉賓，都係一啲神枱級嘅歌手。劉德華、張學友、黎明…每一個都代表住樂壇最輝煌嘅一頁。但今次，嘉賓嘅陣容更加係令所有入場睇嘅聽眾，經歷咗一次時光旅行，展現出香港樂壇呢三十年嚟嘅變遷。故事要由十幾年前講起，當年一位嚟自廣州嘅小伙子，經歷多次唱片公司人事變遷，輾轉落戶到香港，已經開展咗幾年喺香港嘅音樂生涯，事業講唔上好有起色，甚至可能不乏失意落泊嘅時間。直至《#笑忘書》開始，大家逐漸對軒仔認識更多，果陣佢未知道，翌年會因為一首叫「#酷愛」嘅歌而爆紅。做下做下，默默耕耘嘅情況下，開始受到業界人士，尤其一啲同樣喺環球唱片共事嘅前輩賞識，更開始有一啲樂壇前輩搵佢做演唱會嘉賓。喺2006年嘅《琴晚夜紅館騷》，倫永亮邀請咗張敬軒擔任佢嘅演唱會嘉賓，「嘉賓王」開始喺不同歌手演唱會中擔任嘉賓，無論係樂壇前輩、同公司、同期新人嘅音樂會都會見到佢嘅蹤影。每次演出，都令更多人認識張敬軒，亦為佢建立好多好多友誼，好多好多合作嘅機會。而佢冇將一切一切成為佢發展嘅優勢，更多係真心接納所有佢得到嘅嘢，取於斯、用於斯。佢開始利用自己得到嘅嘢幫助同業，只要同業有需要，就會傾囊相助。所以Dear Jane同Rubberband不約而同地用過佢喺廣州嘅錄音室製作唱片，Dear Jane更加受到佢包食包住嘅接待。當洪嘉豪喺佢麾下幫手時，產生咗製作音樂嘅想法時，佢即刻同佢一齊搜羅種種適合洪嘉豪嘅器材，幫助佢建立音樂製作嘅基礎。一切唔係必然，但喺軒公身上，好心地好似係一樣理所當然嘅事。佢嘅好心地，亦不受限於同業，只要佢知道有人需要幫助，佢就會幫。所以梁詠琪做嘉賓時提及嘅故事，足證佢今時今日嘅成就唔係靠幸運就達到。呢廿幾晚雖然相隔幾個月，但仍然記得每一晚邊個做嘉賓成為大家茶餘飯後嘅話題。張敬軒用咗自己嘅努力，將所有大定需要認識嘅聲音介紹俾大家，除咗俾唔同新人踏上台板嘅機會，就好似以前自己所得到嘅機會咁，更多係令大家知道，香港樂壇仲係好有心有力，既有如黎明、陳慧琳等樂壇傳奇，更有許廷鏗、陳柏宇呢班足以撐起樂壇嘅歌手，莫說張天賦、湯令山、柳應廷等新秀洶湧而上，而且藍奕邦、周國賢、王菀之等人仍然好有熱誠，香港每一代都有好出色嘅香港歌手。大家都因為呢個演唱會，表現出香港呢個音樂殿堂潛藏嘅可能性。好感謝張敬軒，唔單止想做好自己嘅演唱會，更加想做好呢個樂壇，令一班樂迷透過每晚唔同嘅嘉賓，唔同嘅故事，完成一次瀏覽香港樂壇簡史嘅旅程，更由唔同人口中講出軒公嘅好人好事，好似一塊塊拼圖咁拼砌佢二十年嚟嘅音樂故事。#張敬軒 @hinscheung 感謝您的一場 有今生 亦肯定有來世的演唱會，一定要唱到50、60、70歲。 購買The Brightest Darkness (CD)- 張敬軒:  

📝 [Written by 私家音樂 c_plus_music] 🎵   去年12，Jason係紅館舉行一連兩場「Fight For Live」。演唱會之後，Jason先Upload咗演唱會嘅「THE FIGHT 紀錄片」去講解佢係演唱會上製作嘅想法。「我演唱會嘅安排，唔係要幫觀眾療傷， 我嘅出發點無咁偉大， 但我當然想同觀眾連結。 但係大部分係為咗做一件轟轟烈烈， 係屬於自己百份百投入同努力， 而產生嘅一件事。」 「路係好難行，但都要一齊行落去，希望大家睇完可以搵到方向繼續走落去。」演唱會Boxset入面嘅份量好重，由封面到入面書仔，都好有份量。所以，搵嚟演唱會嘅Art Direction Kenji Wong去講解一下呢個Boxset入面嘅心思。 關於Fight For入面嘅卡仔係個package內有盒卡，主要想人睇完個演唱會再消化完Jason Fight for 既故事後，諗諗自己為左咩去Fight for。 「Fight for」Booklet 入面劇照係點樣嘅一回事？Fight for演唱會係包括Video Wall嘅故事，因為知道好多觀眾未必會係blu-ray 睇得哂個整個故事，所以係Booklet入面，都Print out左故事劇照。本來想做繪本，但時間關係做唔切。 「其實主要係想將演唱會VT講，佢成長故事帶番去隻碟度」 關於「Fight For」帶出嘅幾個MV (《對得起自己》《有我》)「Fight for」呢個project，一直想搵唔同界別或者被遺忘左既人，一齊Fight for。所以MV都會搵唔同電影既演員，或者無咩人留意既藝人去演出。好似《對得起自己》入面搵嚟姜皓文；《有我》入面都有梁仲恆。「Fight For」呢個Project唔單單係演唱會，仲會連接住Jason嚟緊嘅作品。好似剛剛推出《墜落》都有少少關連。睇完Fight For再去聽Jason嘅新歌，你可能會有更大感受。   購買Fight For_Live in Hong Kong Coliseum (2Blu-ray + 2CD)-陳柏宇:

📝 [Written by 私家音樂 c_plus_music] 🎵    就嚟開紅館嘅關心妍，出道都好一段日子。作為80後嘅小弟，Jade嘅作品係當年一出真係成大熱，K場到商場到電話鈴聲，都係佢嘅歌。.當然我唔會揀哂大熱歌，因為知佢一定會唱。揀咗十首，少少大熱，少少冷門嘅歌，希望嚟緊紅館會聽到啦。.1. 我太強(2003年)作曲：伍樂城 作詞：梁芷珊當年唱K必點之作2.以身試愛(2010年)作曲：伍樂城 作詞：林夕又係唱K挑戰高音必唱之作3.無罪釋放(2003年)作曲：Lee Sang Ho/Lee Jae Kyung 作詞：梁芷珊呢首少少冷門，但都係show off唱功系列！4.像我這樣的一個雅茲迪女子(2016年)作曲：歐陽業 作詞：游思行呢首歌好有意思，細味歌詞。5.白先勇(2006年)作曲：王建威 作詞：周耀輝2006呢隻Jade Loves嘅一大遺珠！6.指南針(2007年)作曲：王建威 作詞：周耀輝好鍾意耀輝呢一份歌詞7.髮調橙(2004年)作曲：Edward Chan/Charles Lee 作詞：游思行/林一峰印象中，呢首好少好少唱Live～.8.世代之初(2009年)作曲：關心妍 作詞：王祖藍呢首又係好有型！9.被注射(2014年)作詞：C-12 作曲：C-1210.愈來愈正常(2014年)作詞：C-12 作曲：C-12最後兩首C-12作品，話題MV都好勁。