音樂樂評 » 樂評

📝 [Written by @on9upmusic ] 🎵 返咗大陸發展一段時間嘅側田，早排宣佈回港再戰樂壇，正式簽約環球，推出新歌《第一秒》。當年側田一出道就成為炙手可熱嘅新人，主要有兩大原因：一，長期戴帽。二，紮實且辨識度高嘅唱功，輕鬆唱紅每首大眾情歌。《第一秒》MV入面嘅側田仍然戴住充滿年代感嘅MK「NY cap帽」，唱腔仍然「17年不變」，驟耳聽《第一秒》其實同當年嘅《好人》、《Erica》、《命硬》係冇大分別，爭啲以為搭咗時光機穿越返咗去2010年。側田出道至今己17年光景，繼續沿用當年嘅「成功之道」係咪明智之舉？咁樣到底係「毫無進步，故步自封」定係「keep到水準，初心不變」呢？17年後嘅今日，樂壇人才輩出，人人風格、歌路鮮明，側田作為實力派前輩，以穩陣牌作為回歸之作，未免太過保守而且無誠意了。始終返咗大陸打拼兩年，吸收嘅音樂養份理應係滿載而歸，《第一秒》的確令人（我）失望，無論站喺歌迷角度上，定係marketing層面上，都唔係一首特別吸引嘅作品，at least唔係一首值得plug，甚至打頭炮嘅歌。   購買love songs from dreams(CD)-側田 Justin Lo:

📝 [Written by @delightcantopop ] 🎵 #悅與歌2022新歌推介初初見到歌名《邊一個發明了ENCORE》以為家謙繼續佢種玩味、幻想同輕鬆歌系列，但第一次聽同睇MV（呢首歌MV比電台同串流平台率先上架）之後，就對首歌有180度轉變，可以話係家謙出道以來最感動、賺人熱淚嘅歌。繼《時光倒流一句話》同《難道喜歡處女座》之後，林家謙再次邀得黃偉文為佢嘅作品填詞，而Wyman再次交出一份好觸動人心嘅歌詞出來。家謙過往嘅情歌作品都會比人一種較為抽離嘅感覺，較多係用一種旁觀者嘅角度敘述，投放感情都較為含蓄。但今次《邊一個發明了ENCORE》就聽到佢有種由第一身出發，用自身角度感受呢份歌詞嘅重量，所以演繹上來都比過往直率。就算係佢最標誌性嘅轉音位，都聽到佢把聲比以往多咗一份情緒，相信都同佢個人用一個更切身嘅角度去感受呢份歌詞有關。能夠令一直都比較「高冷」嘅家謙轉用一個更加直接嘅方法去演繹呢首歌，可能係因為呢份歌詞真係好貼近現實，所描寫嘅內容好容易引起大眾共鳴。好似Wyman之前寫比馮允謙嘅《給缺席的人唱首歌》咁，呢首歌都算係向「缺席」的人致意。近年嘅社會事件、疫情同移民潮都令好多人與人之間嘅距離越拉越遠，好多我哋曾經以為唔會發生嘅事情發生咗，好多我哋以為仲有好多機會見面嘅人突然離開咗，甚至連講句再見機會都無。當呢個情況成為常態，我哋能夠做嘅就只有珍惜每段相遇、每個親友，希望延長每次相聚嘅時間，就好似演唱會不停ENCORE咁。但再多次「安歌」，天下都無不散之筵席，我哋終有道別、分開嘅一日。唯有真正將相處嘅回憶、建立嘅情誼放入心中，先能夠真正將一段關係、一段感情永遠長存。就算此時離了座，定有一個未來能伴著過。   購買林家謙MEMENTO (CD):

📝 [Written by @delightcantopop ] 🎵   #悅與歌2022專輯推介剛踏入出道第五年嘅洪嘉豪正式推出個人第一張「雙碟大碟」《Learning Curve》（2018年曾推出數碼EP《Curiosity》），收錄共十五首作品。呢隻大碟分為「Experience」同「Experiment」兩部份。先講CD1「Experience」，收錄自2019年《十號儲物櫃》起共九首派台歌，以及一首未曾曝光嘅作品《24/7戀人》。呢部份嘅歌雖然大部份都聽過，但經過曲目排序後重聽一次，又感覺甚為新鮮。即使Kaho歌呢兩年歌庫較多屬流行K歌，但當中嘅三首Synth Pop作品喺呢個序列中甚為突出，尤其《曲線型戀情》喺《窮小子》後就顯得特別有趣。而將成隻大碟最早曝光嘅《十號儲物櫃》放喺CD1尾聲，象徵將呢三年嘅種種經歷放入「回憶儲物櫃」，亦別具心思。CD2就係Kaho之前一直提及嘅「音樂實驗」，五首作品都係佢親自包辦哂曲、詞、編、監同唱嘅部份，包括早前派台嘅《活人鏢靶》同最近派台作品《救》。Kaho作曲一向都唔錯，既能夠作到好似《窮小子》呢種一聽即入腦嘅流行曲式，亦可以創作出《我說不可以》、《曲線型戀情》呢種廣東歌較為少見、玩味感同跳脫嘅歌曲，所以作曲方面我從來對Kaho都放心。但講到填詞同編曲，Kaho之前甚少涉獵，今次見到佢一口氣處理哂五首歌嘅曲詞編監，就會見到佢嘅樽頸。呢五首歌並唔係唔好聽，當中《活人鏢靶》同《防火門》我都幾鍾意，但全隻碟嘅氣氛非常相近，特別編曲上嘅變化真係較少，所以有種「一首歌分咗五節播」嘅感覺，旋律嘅吸引度亦比呢種單調嘅編曲掩蓋咗，甚為可惜。不過，既然只係Experiment，我覺得呢個做法亦未嘗不可，但之後再做新Project，填詞同編曲嘅工作考慮part住更專業嘅人做再吸取經驗，可能係更好嘅事。點都好，喺我心目中，洪嘉豪係值得支持，亦值得大家更多嘅關注，所以呢隻碟一出我就已經預購咗。九月份佢再同MC張天賦開show，轉去一個比上年麥花臣更大嘅場館，希望有更多人有呢個福份睇到啦！   購買洪嘉豪Learning Curve (2CD):  

📝 [Written by @on9upmusic ] 🎵 上年新人輩出，其中喺年頭呼聲好高，但turn out成績平平嘅Mike曾比特，唔知係咪覺得自己喺香港太多對手、太少廣告，好難喺同輩之中突圍而出，早幾個月竟然北上發展，參加音樂真人騷《聲生不息》。呀，又真係估佢唔到，節目出咗街短短幾集，又真係畀佢殺出重圍，喺內地人氣急升，勢頭似乎幾好！ 嗱就咁，藝人或歌手返大陸發展，其實我一直都覺得冇問題。始終香港太細，700萬個觀眾亦太少，想發圍、有野心、想大紅大紫嘅人，唔甘心淨係喺呢片彈丸之地撈，係相當合理。加上，唔通其他國家城市有人都鍾意你，想聽你唱歌，你真係會唔想去咩？BTS都紅到癲啦，咪一樣去晒全球開騷。姜濤都話要做亞洲第一啦，咁唔通你逼佢淨係喺香港咩？可能有人會覺得，好多歌手當香港係跳板，當香港觀眾係水魚，一紅就出走香港，冇晒影。但又試問，有邊個國際歌手唔係咁呢？Lady Gaga先喺美國爆紅，短短一兩年全球無人不曉，咁人哋咪向世界發展囉，咁唔通美國人又鬧Gaga當美國係跳板咩？咪玩啦。Mike其實係唱得之人，爆炸頭造型我亦十分欣賞。但喺香港仲未站穩陣腳，代表作都未有一首就向高空發展，呢座大樓似乎起得有啲急趕，驚遲早會塌。Any肥，祝福佢搵到音樂上嘅伯樂，發掘屬於自己嘅音樂路向（唔係老土Eric Kwok style）亦希望所有北上發展嘅歌手藝人，可以敢於喺節目稱自己「我來自香港。」咁就足夠。   購買MIKE (Deluxe Version)(CD)-Mike 曾比特: